Үкімет отырысында қай өнімдердің бағасы қымбаттағаны айтылды

Ұлттық банк төрағасының орынбасары Данияр Вагапов Қазақстанда қай өнімнің бағасы қымбаттағанын айтты.  Бұл туралы Bugin.kz тілшісі Tengrinews.kz сайтына сілтеме жасап хабарлайды.

Ұлттық банктің мәліметінше, азық-түлік инфляциясы жылдық мәнде 10,4 пайызға дейін баяулады. Айлық азық-түлік инфляциясы өткен айда 0,3 пайыздан 0,5 пайызға дейін өскені атап өтілді.

"Қазан айында азық-түлік тауарларынан жұмыртқа, нан өнімдері мен жарма бағасы көтерілді. Қант пен тәттілер, жаңа піскен жемістер мен ет қымбаттады. Ірімшік, жаңа піскен көкөністер мен күнбағыс майы арзандады", - деді Вагапов үкімет отырысында.

Ұлттық банк төрағасы орынбасарының айтуынша, ай сайынғы көрсеткіште өсім 0,8 пайызды құраған.

"Қазан айында аудиовизуалды техника, қатты отын, дәрі-дәрмек пен медициналық техника, киім-кешек, аяқ киім тауарларының бағасы өсті. Сонымен қатар тұрмыстық техника, жуғыш және тазалау құралдарының бағасы төмендеді",- деп қосты спикер.