Қария 50 жыл жұмыс істесе де, 24 мың теңге зейнетақы алады

Алматы облысының 81 жастағы тұрғыны Василий Кулеш жарты ғасырлық еңбек өтілі бар еңбек ардагері болса да, 24 мың теңге базалық зейнетақы алады. Зейнетақысы тамақ пен дәрі-дәрмекті айтпағанда, коммуналдық қызметке әрең жетеді. Бұл туралы Bugin.kz тілшісі Almaty.tv сайтына сілтеме жасап хабарлайды.

Қария бұл мөлшердегі зейнетақыны 20 жылға жуық алып отыр. Мәселе кәсіпорында оның еңбек жолы туралы мұрағат пен еңбек кітапшасы жоғалып кеткендіктен туындап отыр. Зейнеткердің айтуынша, егер туыстарының көмегі болмағанда, ол баяғыда дүниеден өтетін еді.

"Біз қалай бұл күйге түстік? Мен 50 жылға жуық жұмыс істедім, тіпті артық ақша жинамадым. Осылайша біз адал өмір сүрдік, жұмыс істедік, болды. Қандай ұят... Мен ешкімге керек емеспін. Бала-шағам мен немеремнің арқасында өмір сүріп жатырмын. Маған өмір сүруге олар көмектеспесе,  мен бұл жерде болмас едім", - дейді еңбек ардагері.

Зейнеткердің айтуынша, оның еңбек қызметі туралы аз да болса дерек тауып алмақ болып, мемлекеттік мұрағатқа жүгінген, бірақ нәтиже болмаған. Мәселені тек сот арқылы шешуге болады. Бірақ шарттары бар.

"Еңбек өтілі еңбек кітапшасымен расталады. Ол болмаған жағдайда еңбек өтілі жұмыс туралы немесе мемлекеттік мұрағаттағы мәліметтермен расталады. Егер мұрағатта деректер болмаса немесе сақтауға алынбаса, онда еңбек өтілі тек сот шешімімен расталады", - деп түсіндірді Талғар аудандық әлеуметтік қамсыздандыру бөлімінің басшысы Құралай Тоқымтаева.

Сотқа жүгіну үшін бір кәсіпорында жұмыс істеген кемінде екі куәгер қажет. Дегенмен осыншама жылдардан кейін зейнеткерге бұрынғы әріптестерін табу оңай емес. Телеарна журналистері кәсіпорынның бұрынғы қызметкерлерінің бірін тауып үлгерді. Ол Василийдің әңгімесіне таң қалды және оның командада әрқашан жақсы жағдайда болғанын айтты.

"Жалпы ол жерде жеті жыл жұмыс істедім. Мен оны жақсы білетінмін. Еңбек ардагері, өзіңіз түсінесіз, әйтеуір, бірдеңе алуы керек. Оның 23-24 мың теңге зейнетақы алуы мүмкін емес. Оған қалай күн көреді?! Мен танитын көптеген адам еңбек тарихы туралы деректері қолжетімсіз болып, мардымсыз зейнетақы алып жүр. Бұл әділ емес қой", - деп атап өтті зейнеткердің бұрынғы әріптесі Валентина Сельцова.

Василий Кулештің жалғыз үміті – сотта жұмыс тәжірибесін растай алатын басқа әріптесін табу.