Астанадан шығатын жолдың бәрі жабылды

Ауа райының нашарлауына, көктайғақ пен күшті дауылға байланысты Астанадан шығатын барлық жолдар жабылды. Бұл туралы Bugin.kz тілшісі  "ҚазАвтоЖол"  ұлттық компаниясының ресми ақпаратына сілтеме жасап хабарлайды.

"ҚазАвтоЖол" сайтының хабарлауынша,  Астанаға кіретін және шығатын барша бағыттар бойынша көліктердің барлық түрлері үшін қозғалысқа шектеулер енгізілген.

Елордалық "City Transportation Systems" көлік компаниясы қала маңындағы барлық бағыттарды уақытша тоқтатқанын хабарлады. Астанада жаңбыр жауып, кейін қатты жел тұрып, көшелерде көктайғақ болды. Төтенше жағдайлар департаменті мен әкімдік қала тұрғындарына ескерту жасады.

Қазгидрометтің мәліметінше, бүгін, 22 қарашада Астанада екпіні секундына 16-21 метрге жететін жел соғады. 23 қарашада да көктайғақ күтілуде, бірақ желдің екпіні кей жерлерде секундына 23-28 метрге дейін күшейеді.

Құтқарушылар азаматтардан көшеде абай болуды, төтенше жағдай орын алған жағдайда 112 телефоны арқылы жедел жәрдем шақыруды сұрайды.