Алматыда электр энергиясы қымбаттады

Алматыда электр энергиясы қымбаттады, - деп хабарлайды Bugin.kz порталы. Бұл туралы қалалық мәслихаттың кезектен тыс ХІ сессиясы барысында белгілі болды.

"1 қарашадан бастап электр энергиясына тариф: 1 киловатт/сағ үшін заңды тұлғаларға - 1,2 пайызға (0,31 теңгеге – 26,4 теңгеден 26,7 теңгеге дейін), жеке тұлғаларға – 7 пайызға (1,51 теңгеге – 21,6 теңгеден 23,1 теңгеге дейін) көтерілді", - деді Алматы әкімі орынбасары Асқар Амрин.

Сондай-ақ, ол әлеуметтік жағынан осал азаматтарға қосымша қолдау көрсету мақсатында өтемақы көлемін 0,6 АЕК-ке (2070 теңге) дейін көтеру және мәслихаттың тиісті шешімін қабылдау ұсынылып отырғанын хабарлады.

"Бұл тұрғын үйге берілетін әлеуметтік көмекті 345 теңгеге арттыруға мүмкіндік береді", - деді Алматы әкімінің орынбасары.