Жамбыл облысында отар қойымен жоғалып кеткен екі шопанның жағдайы белгілі болды

Жамбыл облысында отар қойымен жоғалып кеткен екі шопанның жағдайы белгілі болды, деп хабарлайды, Bugin.kz порталы zakon.kz сайтына сілтеме жасап.

2023 жылы 12 желтоқсанда сағат 00:24 шамасында Шу ауданы, Көкқайнар ауылынан 15 шақырым жерде шаруа қожалықтардың бiрiнің екі малшысы адасып, жоғалып кеткені туралы хабар түсті.

Жедел-іздестіру жұмыстарына полиция қызметкерлері, аудан әкімдiгi, ТЖД қызметкерлерiнен бөлек жергілікті тұрғындар да жұмылдырылды. Қалың қар басқан жолдар “Грейдер” техникасымен аршылып, айналаны жiтi қарау шаралары ұйымдастырылды.

"Жедел-іздестіру жұмыстарының нәтижесінде түнгі сағат 3.00 кезінде малшылар және қарауындағы малдары аман-есен табылды. Құтқарылған азаматтардың жағдайы бірқалыпты, медициналық көмекті қажет етпеді", - деді Шу ауданы полиция бөлімінің бастығы полиция подполковнигі Дiнмұхамбет Қойтөриев.