Шымкентте 176 млн теңгеге жуық қарызы бар жүргізуші ұсталды

Шымкентте “Қорғау” қосымшасы 176 млн теңгеге жуық қарызы бар жүргізушіні анықтады, деп хабарлайды  Bugin.kz порталы Polisia.kz сайтына сілтеме жасап.

“Қорғау” бағдарламасы арқылы қалалық ПД жедел басқару орталығының қызметкерлері төленбеген қарыздары бар көлік жүргізушісі туралы сигнал алды. Lexus көлігі иесінің атқарушылық іс жүргізу бойынша 176 миллион теңгеге жуық берешегі бар екені анықталды. Жібек жолында тұрған көлікті ұстау үшін патрульдік полиция қызметкерлері жіберілді. Төлеуден жалтарған ер адамға оған борыштарын өтеу туралы ескертілді. Ал темір тұлпар айыптұраққа қойылды.

Азамат оны қарыздарын толық төлеген соң ғана қайтарып алады. Айта кетейік, жол қауіпсіздігін қамтамасыз ету бағытында “Қорғау” қосымшасы жалған нөмірлер, өтелмеген қарызы бар азаматтар мен басқа да заң бұзушылықтарға жиі жол беретін қауіпті жүргізушілерді анықтайды.