Елорда тұрғыны Telegram мессенджері арқылы 342 млн теңге заңсыз пайда тапқан

Елорда тұрғыны әлеуметтік желі арқылы заңсыз ақша тапқан, деп хабарлайды Bugin.kz порталы Астана арнасына сілтеме жасап.

Ол Telegram мессенджерінде цифрлық активтерді заңсыз ақшалай сыйақыға айырбастау қызметін ұйымдастырған.

Қылмыстық істі қаржы мониторингі агенттігінің астаналық департаменті байқаған. Бүгінде аса ірі көлемдегі цифрлық активтерді айырбастау саласындағы заңсыз кәсіпкерлік қызметке қатысты қылмыстық іс қозғалды.

"Аталған азаматтың Қазақстан аумағында кепілдендірілген цифрлық активтерді сату/сатып алу туралы мессенджер арқылы хабарландыру жіберіп, крипто айырбастау қызметін ұсынғаны анықталды", - делінген хабарламада.

Осы әрекеттерімен ол жеке тұлғаларға, оның ішінде резидент еместерге Қазақстандағы кез келген қамтамасыз етілген еркін айырбасталатын валютаға қамтамасыз етілмеген электрондық цифрлық активтерді сатып алу мүмкіндігін ұсынған.

ҚР ҚПК 201-бабының талаптарына сәйкес, сотқа дейінгі тергеп-тексерудің өзге де деректері тергеу мүддесі аясында жария етілмейді.