Астанада ер адам әйелінің туысын өлтіруге 10 миллион теңге берген

Астанада әйелінің туысын тапсырыспен өлтіруді жоспарлаған ер адамға қатысты іс қаралды, деп хабарлайды Bugin.kz порталы елордалық сотқа сілтеме жасап.

2023 жылдың 3 қарашасында қылмыстық істер жөніндегі мамандандырылған ауданаралық соты тапсырыспен кісі өлтіру ісі бойынша екі ер адамға үкім шығарды.

"Сотталған: сотталушы Ш., алдын ала сөз байласу бойынша адамдар тобымен жасалған, пайдакүнемдік мақсатта, сондай-ақ жалдау бойынша адам өлтіруге дайындықты ұйымдастырғаны үшін - 10 жылға дейін. Қылмыстық кодекстің (28-баптың 3-бөлігі, 24-бабының 1-бөлігі - 99-бабының 2-бөлігі, 7-тармақтары).

Сотталушы Н.-ға іске қатысқаны үшін – 7 жыл 6 айға бас бостандығынан айыру жазасы тағайындалды. (ҚК-нің 28-бабының 5-бөлігі, 24-бабының 1-бөлігі – 99-бабының 2-бөлігі, 7,8-тармақтары)", - деп хабарлады елордалық соттың баспасөз қызметі

Сот анықтағандай, сотталушы Ш. сотталушы Н.-ны әйелінің әпкесін 10 миллион теңгеге өлтіруге міндеттеген. Қылмысты жасауға түрткі болған себеп – сотталушы Ш.-ның әйелінің туысы сақтап қойған ақшаны жұмсағаны.