"Тоқаевтың күзетшісі кім болады?": іріктеу басталды

2024 жылы 1 наурыз бен 5 сәуір аралығында Қазақстан Республикасы Мемлекеттік күзет қызметі қатарына мерзімді әскери қызметке іріктеу басталады, Bugin.kz порталы деп хабарлайды Dalanews.kz сайтына сілтеме жасап.

Қазақстан және шетел жаңалықтарын бірінші болып біздің Telegram арнамыздан оқыңыз!

Осы тұста ҚР МКҚ өкілдері барлық облыс орталығы мен республикалық маңызы бар қалаларда үміткерлерді таңдау жұмысын жүргізеді.

Үміткерлерге қандай талап қойылады?

Жасы: 18-27 арасында,

Бойы: 180 см-ден төмен емес және 195 см-ден жоғары емес,

Білімі: орта білімнен төмен емес,

Денсаулығы: жақсы.

Жоғары білімді, спорттық жетістіктері мен разряды бар шақырылушыларға басымдық беріледі.

"ҚР МКҚ қатарына өткен шақырылушылар мерзімді қызметін Астана және Алматы қалаларындағы 0112 және 0111 әскери бөлімдерінде атқарады", делінген хабарламада.

ҚР Мемлекеттік күзет қызметі қатарында мерзімді қызмет сарбаздары Қазақстан Республикасы Президентінің және басқа да күзетілетін адамдардың қауіпсіздігін қорғау, рәсімдік және протоколдық іс-шараларға қатысу, ҚР Мемлекеттік Туы мен ҚР Мемлекеттік Елтаңбасы эталондарын күзету секілді айрықша міндеттерді атқарады.

ҚР МКҚ әскери бөлімдерінде мерзімді қызмет атқару барысында жас сарбаздар тәжірибелі нұсқаушылық құрамның жетекшілігімен әскери іске үйренеді, жауынгерлік және арнайы даярлық сабақтарында әскери мамандықтарды меңгереді.

"ҚР МКҚ мерзімді қызмет сарбаздарының әрі қарай кадрлық тұрғыдан өсуге мүмкіндігі бар. Мерзімді қызмет аяқталған соң олар өз қалауы бойынша келісімшарт бойынша әскери қызметті жалғастыра алады, одан әрі арнаулы мемлекеттік органның қызметкері және офицері болып, күзетілетін адамдар мен объектілердің қауіпсіздігін қамтамасыз ету бойынша міндеттерді атқара алады", - деп хабарлайды ҚР МКҚ баспасөз қызметі.

ҚР МКҚ мерзімді қызмет сарбаздары үшін Қазақстан Республикасында мерзімді әскери қызмет атқарған азаматтарды әлеуметтік қолдау бойынша белгіленген барлық жеңілдіктер қолданылады.