"Сақ болыңыздар!": алаяқтар енді елді жаңа тәсілмен алдап жүр

Павлодар облысында алаяқтықтың жаңа тәсілі белгілі болды. Бұл туралы Bugin.kz тілшісі Polisia.kz сайтына сілтеме жасап хабарлайды.

“SIM-картаңыздың жарамдылық мерзімі жақын арада аяқталады” деп хабарласқан кезде адамдар сергек әрі сақ болуы керек екен. Жақында мұндай қоңыраулар арқылы алаяқтық жағдайларының көбеюі байқалды. Бұл азаматтардың назарын және хабардар болуын талап етеді.

Павлодар облысы ПД криминалдық полициясының киберқылмысқа қарсы күрес бөлімінің бастығы Ризабек Жанат:

"Жақында полицияға тұрғыннан ұялы байланыс операторының болжамды қызметкері атынан қоңырау шалынғандығы туралы хабарлаған өтініш түсті. Қаскөй азаматқа SIM картасының жарамдылық мерзімі аяқталатыны туралы хабардар еткен және ол үшін белгілі бір смс-кодты көрсете отырып, мерзімді ұзартуды ұсынған. Қоңырау шалушыға сеніп, азамат кодты енгізген.  Алаяқтар осы код арқылы оның жеке деректеріне қол жеткізген және оның атына несие рәсімдеген", – деп мәлімдеді.

Сондықтан азаматтардың сақтық танытуы және мұндай қоңырауларға сенбеуі өте маңызды. Әсіресе, олар белгісіз нөмірлерден келсе ерекше сақ болу қажет. Егер сіз дереккөздің түпнұсқалығына сенімді болмасаңыз, ешқашан жеке деректерді бермеуіңіз немесе телефон арқылы алынған кодтарды енгізбеуіңіз керек.