Көшет отырғызудың қандай пайдасы бар?

Алла елшісі (с.ғ.с.): "Сендердің біріңнің қолында көшет тұрғанда Қиямет уақыты келіп қалса, шамасы жеткенінше оны екпей қоймасын", – деген. (Хадисті Ахмәд жеткізген)

Енді осы хадистен алынатын пайдаларға тоқталар болсақ: 

1) Қиямет уақыты адам күтпеген сәтте аяқ астынан келіп қалуы мүмкін;

2) Өмірдің соңғы сәтінде болсын мүмкіндікті қолданып, сауап алып қалу керек;

3) Өзіне пайдасы тимейтінін біліп тұрса да Ахиретте сауап болуы үшін әрекет еткен жөн;

4) Көшет бірден жеміс бермейтінін біле тұра оны егуге тырысу - жақсылықтың қайтарымы бірден бола қоймайтынын білдіреді; 

5) Көшет – кішкентай шыбық. Одан үлкен нәтиже күту - әбестік секілді көрінуі мүмкін. Жақсы амал да сол секілді. Кейде жақсылықты қорашсынып, жүзеге асырмағандықтан сауаптан айырылуымыз мүмкін;

6) Мұсылман тек өз басының ғана емес, өзгелердің де қамын ойлайды;

7) Уақыттың әр сәтін пайдаланып қалуға тырысқан жөн;

8) Келешекке үмітпен қарау керек; 

9) Әрдайым жақсы ойлауға тырысқан дұрыс;

10) Дініміз жалқау болмауға, еңбек етуге шақырады;

11) Пайғамбар (с.ғ.с.) үмбеті үшін жақсылық қалайды; 

12) Әрекеттен күдер үзбей, шамасы жеткенше тырысу керек;

13) Біреуден жақсылық күте бермей өз еңбегімен күн көруге үндейді;

14) Адам ниетін түзету арқылы кішкентай істен үлкен сауап алуы мүмкін;

15) Көшет егу – ізгі іс; 

16) Мұсылман өзінен кейінгілер де пайдалануы үшін жақсылық жасайды; 

17) Өмірге налып, жағдайға шағымдана бермей амал-әрекет жасауға тырысу керек.