"Ең кедей елдер" рейтингісі: Қазақстан нешінші орынға жайғасты?

Әлемдегі ең кедей елдер рейтингісінде Қазақстан төменгі орында екені анықталды, деп хабарлайды Bugin.kz порталы.

Бұл статистиканы Global Finance журналы жариялаған.

Орталық Азиядағы көршілері арасында "ең кедей елдер" тізімінде Қазақстан 128-ші орынға жайғасқан. 34 534 АҚШ долларын құрайтын жалпы ішкі өнім мен сатып алу қабілетінің паритеті бойынша біздің еліміз ең жоғары экономикалық мәртебеге ие. Сондай-ақ, осы рейтинг арқылы Қазақстан Орталық Азия республикалары арасында "ең бай ел" деп танылған.

Рейтингке сәйкес, Түрікменстан 101-ші орында тұрса, Өзбекстан мен Қырғызстан 67-ші және 48-ші орынға жайғасқан. Рейтингтегі Орталық Азия елдерінің ішіндегі ең кедей мемлекет саналған - Тәжікстан. Ол 43-ші орында тұр.

Ал халық арасында "туристік мекенге" айналған Түркия Қазақстанды басып озып, рейтингте 140-орынға жайғасқан.

Ал тізім бойынша әлемдегі ең кедей елдердің бірі -  Оңтүстік Судан. Екінші орында Бурунди мемлекеті болса, үштікті қорытындылаған Орталық Африка Республикасы.