Шымкентте жас ана үшемді дүниеге әкелді

Шымкент тұрғыны Айгүл Бақытжанқызы үшем дүниеге әкелді, деп хабарлайды Bugin.kz порталы kyn.kz-ке сілтеме жасап. 

 24 жастағы жас ана мерзімінен бұрын, яғни жүктіліктің 31-аптасында қалалық перзентханада босанған.

Дүниеге келген сәбилердің үшеуі де — ұл бала. Оларға Мырзахмет, Нұрмаханбет, Дінмұхаммед есімдері берілді. 

Нәрестелердің бірінің салмағы — 1580 грамм болса, екіншісі — 1640 грамм, үшінші сәбидің салмағы — 1610 грамм. 

Қалалық денсаулық сақтау басқармасындағылар дәрігерлер үшемді алдымен жансақтау бөлімінде бақылауда ұстағанын, тиісті ем-шараларды жасап, кейін палатаға ауыстырғанын айтты.

Салмақ қосып, жағдайы жақсарған сәбилер мен жас ананы бүгін перзентхана қызметкерлері салтанатты рәсіммен үйіне шығарып салды.