Соғыс оты өршіп тұрғанда Зеленскийдің өкілеттік мерзімі аяқталды. Енді не болады?

Украина президентінің өкілеттік мерзімі ресми түрде 20 мамырда аяқталды.  Бұл туралы Bugin.kz тілшісі webtv.un.org сайтына сілтеме жасап хабарлайды.

Біріккен Ұлттар Ұйымы Владимир Зеленскийдің мемлекет басшысы ретіндегі өкілеттігі 20 мамырда ресми түрде аяқталғанына қарамастан, оны Украина президенті ретінде тануды жалғастырады.

Біріккен Ұлттар Ұйымы Бас хатшысының өкілі Стефан Дюжаррик мәлімдемесінде:

"Украинаның мемлекет басшысымен және бас хатшысымен сөйлесу қажет болғанда біз сөйлесетін адам Президент Зеленский болады", - деді.

Зеленский 2019 жылы Украина президенті болып сайланды және сол жылдың 20 мамырында қызметіне кірісті. Украина басшысы бес жылдық мерзімге сайланады, сайлау 2024 жылдың наурыз айында өтуі керек еді. Ел Конституциясы бойынша оларды әскери жағдай режимінде өткізуге тыйым салынған. Әскери жағдай 2022 жылдың ақпан айынан бастап күшіне енді.

2023 жылдың қарашасында Жоғарғы Рададағы фракциялардың жетекшілері меморандумға қол қойды. Оған сәйкес сайлауды елдегі ұрыс аяқталғаннан кейін ғана өткізуге болады. Украина Орталық сайлау комиссиясының төрағасы Олег Диденко әскери жағдайды ескере отырып, 20 мамырдан кейінгі Украина басшысының өкілеттігі жаңа сайлау өткізілгенге дейін автоматты түрде ұзартылатынын айтты. Мұны Әділет министрі Денис Малюска да растады.