Қар аралас жаңбыр: алдағы демалыс күндері ауа райы қандай болады?

"Қазгидромет" мамандары алдағы демалыс күндеріне арналған ауа райы болжамын жариялады, – деп хабарлайды Bugin.kz порталы.

Алдағы үш күнде еліміздегі ауа райына солтүстік циклон әсер етіп, қар аралас жаңбыр, бұршақ жауып, найзағай ойнап, екпінді жел болады.

"25-27 мамырда елдің солтүстігінде, 25-26 мамыр күндері орталық және оңтүстік-шығыс облыстарда, 26 мамырда шығыста жаңбыр, қар жауады.  Скандинавия аймақтарынан келетін ауқымды антициклон ықпалымен республиканың батысында күн ашық болады", – делінген "Қазгидромет" хабарламасында. 

Салқын ауа массалары әсерінен 25 мамырда батыста, солтүстік-батыста, солтүстікте, 26 мамырда орталықта, 27 мамырда шығыста, оңтүстік-шығыста, 26-27 мамырда Оңтүстік Қазақстанның таулы аймақтарында түнде және таңертең ауаның температурасы 3 градусқа дейін төмендейді.