Сотталғандарға телефон жеткізбек болғандар анықталды

Солтүстік Қазақстан облысы бойынша қылмыстық-атқару жүйесі департаменті тыйым салынған заттарды мекемеге алып кіруге болмайтынын ескертеді, - деп хабарлайды Bugin.kz порталы Polisia.kz сайтына сілтеме жасап. 

Ведомство мәліметінше, жыл басынан бері СҚО бойынша ҚАЖ департаментінің ведомстволық бағынысты мекемелерінде жалпы саны 27 ұялы байланыс құралдарын алудың 6 фактісі тіркелген.

“Биылғы жылдың 5 айының қорытындысы бойынша ҚР ӘҚБтК-нің 481-бабы бойынша екі азамат әкімшілік жауапкершілікке тартылып, біреуіне ескерту шығарылды. Тыйым салынған заттардың енуіне жол бермеу мақсатында қызметкерлер қызметтік иттерді пайдалана отырып, мекемелерге іргелес аумақтарды тұрақты негізде патрульдеуді жүзеге асырады”,- делінген хабарламада. 

Ведомство мекеме аумағына кіретін және шығатын барлық тұлғалардың тексеруден өтетінін ескертті.