"Корольдік клубқа" ауысқан Мбаппенің бала арманы орындалды

"Реал Мадрид" футбол клубы көптен күткен трансферін сәтті жасады. Олар Килиан Мбаппенің командаға қосылғанын ресми түрде растады, - деп хабарлайды Bugin.kz тілшісі.

Журналист Фабрицио Романо 25 жастағы француз шабуылшысы мадридтік клубтағы өнер көрсететін нөмірін таңдағанын жазды. Оның айтуынша, Килиан Мбаппе отандасы Карим Бензема "Реалдан" кеткеннен кейін бос қалған "9" нөмірінде ойнайды. 

Мбаппе клуб басшылығынан өзіне ұнайтын оныншы нөмірді сұрамаған. Килиан Франция құрамасында дәл 10-нөмірде ойнайды. "Реалдың" жаңа мүшесі осы номерде алаңға шығатын Лука Модричке құрмет көрсеткен. Хорватиялық спортшы клубта тағы бір маусым қалуды ұйғарған. Мбаппе өзінің сүйікті нөмірін осы себепті талап етпеді.

Футболшы "ПСЖ"-да ойнаған 7-нөмірі "Реал Мадридте" де бос емес. Бұл нөмір команданың жұлдыздарының бірі бразилиялық Винисиус Жуниорға тиесілі. Мбаппенің "корольдік клубпен" келісімшарты 2029 жылдың ортасына дейін жасалған.

Мбаппе желідегі парақшасында арманы орындалғанын айтып, қуанышты екенін жеткізді.