Бұрынғы уақыт белдеуі қайтарыла ма? Вице-министр жауап берді

Сауда және интеграция вице-министрі Қайрат Балықбаев уақыт белдеуіне қатысты ақпарат берді, деп хабарлайды bugin.kz порталы kazinform.kz сайтына сілтеме жасап.

Уақыт белдеуін бұрынғы режимге қайтару туралы петицияны талқылау кезінде Сауда және интеграция вице-министрі Қайрат Балықбаев жауапты мемлекеттік органның алдын ала шешімін жариялады.

Сайт мәліметінше, 2 сағаттан астам уақытқа созылған жиында екі тарап ортақ шешімге келе алмаған.

Отырыстың төрағасы ретінде сөз алған Қайрат Балықбаев петиция талабына байланысты шешім жобасын жариялады. Алайда бұл айтылған шешім тек жоспар ғана екенін, нақты шешім емесін ескертті.

"Мен алдын ала шешімді айтайын деп отырмын. Уақыт белдеуін бұрынғы қалпына қайтару туралы петиция өкілдерінің уәждерін талқылай келіп, ол талапты орындаудан бас тарту жөнінде шешім қабылдауға бекініп отырмыз. Мен бүгінгі жиынның төрағасы ретінде осы 1,5 ай ішінде сіздер атқарған бүкіл жұмыстың қорытындысы бойынша өтінім берушілер келтірген уәждердің ешбірін дәлелдейтін фактілер табылған жоқ. Уақыт белдеуінің өзгеруі азаматтардың денсаулығына да, электр қуатын тұтыну шығындарына да әсер еткен жоқ", — деді вице-министр.