ТҮРКІСТАН ОБЛЫСЫ: ОТЫРАР ӨНЕРПАЗДАРЫ ТҮРКІСТАН ТӨРІНДЕ

Түркістан қаласындағы «Өнерлі өлке» облыстық өнер фестивалі аясындағы Отырар ауданының мәдениет күндері «Керуен сарай» туристік кешеніндегі аудан өнерпаздарының қатысуымен өткен гала-концертпен жалғасын тапты.

Мәдени шарада ауданнан шыққан танымал тұлғалардың туындылары мен күмбірлеген күй, мың бұралған би де көрініс тапты. Концертте сатира сардарлары Уәлибек Әбдірайымов пен Жүсіп Ақшора, «Алтын домбыра» иегері Бекарыс Шойбеков пен айтыс ақтаңгері Анар Жаппарқұлова және ән өнерінің жұлдыздары Хадиша Шалабаева, Берік Сексенбек, Ермахан Әшіров арнайы қонақ болып, «Бақыт айдынында» бишілері, «Бастау» тобы мен «Қыздар» триосы және тағы басқа аудан өнерпаздарымен бірге өнер көрсетті. Кешті белгілі журналист Қайырхан Мәулен мен Гүлімқұлжа Сейтқазы жүргізді.

Салтанатты жиынды аудан әкімінің орынбасары Айдос Құлмаханов ашып, қасиетті қала тұрғындары мен қонақтарын құттықтады.

Ол өз сөзінде: «Ежелден "Ұлылардың Отаны" саналған киелі Отырар өңірі өзінің көптеген талантты, дарынды перзенттерімен мақтана алады. Кешегі ғұлама ғалым Әбу Насыр Әл-Фараби мен рух сардары Өзбекәлі Жәнібеков, тіл жанашыры Өмірзақ Айтбайұлы, Әлем ақыны Мұхтар Шаханов, ән падишасы Шәмші Қалдаяқов, күш атасы Қажымұқан Мұңайтпасов, айтыстың ақберені Тәушен Әбуова, халық ақыны Әселхан Қалыбекова секілді тұлғалар сөзіміздің дәлелі болары анық. Бүгінде ұлы тұлғаларымыздың ізін басып келе жатқан талантты жастарымыз да аз емес. Бүгінгі Отырар ауданының мәдениет күндері аясында «Киелі Отырардан – қасиетті Түркістанға» рухани керуен көші Түркістан қаласына келіп отыр. Алдағы екі күн бойы отырарлық өнерпаздардың концерттік бағдарламасы көпшілік назарына ұсынылып, қолөнер және қылқалам шеберлерінің көрмесін тамашалап, ежелгі көшпенділер мәдениетімен танысып, қазақ халқының тұрмыстық әдет-ғұрпы көріністеріне куә боласыздар. Осынау шарада баршаңызды отырарлық өнерпаздардың өнері мен ұлттық құндылықтарымыздың жаңғыруына куә болып, рухани сусындап қайтуға шақырамын»-деді.

Түркістан төрінде өтіп жатқан өнер фестивалінің алғашқы күнінде этноауылда «Отырар – өнерлі орда» атты Отырар өнерпаздарының концерттік бағдарламасы мен «Ұлттық қолөнер – бабалар мұрасы» тақырыбындағы қолөнер шеберлерінің көрмесі көпшілік назарына ұсынылып, қала қонақтары «Сырлы бояулар сыр шертеді» атты қылқалам шеберлерінің көрмесін тамашалады. Сондай-ақ, көшпенділер мәдениетімен танысып, қазақ халқының тұрмыстық әдет-ғұрпы көріністеріне куә болды. «Ұлы дала дәстүрі» айдарымен халқымыздың салт-дәстүрінен көріністер қойылып, ауыл шаруашылығы өнімдері мен аудан тарихынан сыр шертетін көрме көпшіліктің назарына ұсынылды.

Айта кетейік, мәдениет күндері бүгін де жалғасады. Бүгін, яғни, 5 қазан күні сағат 10:00-ден бастап Этноауылда қолөнер бұйымдары мен сурет көрмелері, 11:00-де көше театры қойылымдары көпшілік назарына ұсынылады. «Ұлттық ойын – ұлттың игілігі» айдарымен ұлттық спорт ойындары түрлерінен сайыс өткізіледі.