Түркістан өңірінде кезекті спорт нысаны ашылды

Түркістан облысы Созақ ауданыдағы Жуантөбе ауылында қос бірдей спорттық нысан іске қосылып, пайдалануға берілді, деп хабарлайды Bugin.kz порталы Түркістан облысы әкімдігіне сілтеме жасап.

Бүгін Жуантөбе ауылында ауыл қарияларының мәселелері шешімін тауып, екі спорттық нысан іске қосылды. Төле би көшесінің бойында орналасқан кіші футбол алаңы толық жөндеуден өткізіліп, аумағы кеңейтілді. Бұған қоса ауыл тұрғындарының сұранысына сәйкес, ауылдық клуб жанында заманауи жаттығу залы ашылды. Жаттығу залында жастардың спортпен шұғылдануына қажетті спорт жабдықтары орнатылып, барлық жағдай жасалған.

Аудан әкімі Мұхит Тұрысбеков Жуантөбе ауылына жұмыс сапары барысында жаңа нысандарды аралап, олардың жай-күйімен танысты. Аудан басшысы ауыл қарияларымен тілдесіп, спорт нысандарының ашылуымен құттықтады. Спорт ауыл жастары үшін денсаулық пен белсенділіктің қайнар көзі екенін атап өтті.

Ауыл қариялары іске қосылған спорт алаңы мен жаттығу залы ауыл жастарының шынығуы мен бос уақыттарын тиімді өткізулеріне үлкен мүмкіндік беретінін айтты. Қуаныштарымен бөлісіп, алғыстарын жеткізді.