13 жастағы мопед жүргізушісін көлік қақты

Астанада Мәңгілік Ел даңғылында көлік мопедисті қағып кетті, деп хабарлайды Bugin.kz порталы. 

Алдын ала мәлімет бойынша, мопедті 2011 жылғы бала айдаған.

Полиция департаменті баспасөз қызметінің хабарлауынша, 4 қараша күні Мәңгілік Ел даңғылы мен Алматы көшесінің қиылысында кәмелетке толмаған мопед жүргізуші жол апатына ұшырады.

"Оқиға орнына барған полиция жасағы жасөспірім Мәңгілік Ел даңғылымен Керей-Жәнібек хандар көшесіне қарай жүріп келе жатып, бағдаршамның тыйым салынған сигналына өтіп, жүргізушісі қарсы бағытта маневр жасап жатқан Hyundai көлігімен соқтығысқан. Кәмелетке толмаған бала ауруханаға жатқызылды. Оқиғаның мән-жайы анықталып жатыр", - деп хабарлады полицейлер.

Астананың денсаулық сақтау басқармасының мәліметінше, жедел жәрдем дәрігерлері №2 қалалық көпсалалы балалар ауруханасына 2011 жылы туған ұл баланы жеткізді.