ТҮРКІСТАН: ДЕРБІСЕК АУЫЛДЫҚ ОКРУГІНІҢ ТҰРҒЫНДАРЫМЕН КЕЗДЕСУ ӨТТІ

Аудан тұрғындарымен келесі кездесу Дербісек ауылдық округінде өтті, деп хабарлайды Bugin.kz порталы Сарыағаш ауданы әкімінің баспасөз қызметіне сілтеме жасап.

Аудан әкімінің міндетін уақытша атқарушы Мұрат Байгабулов алдыңғы өткен кездесулерде айтылған мәселелер бойынша атқарылған жұмыстарды баяндап, алдағы жоспарлармен бөлісті.

Дербісек елді мекеніне қарасты К.Бахашбаев, Е.Омарханов көшелеріне көше жарықшамдар орнатылып, іске қосылды. Оған қоса, Дербісек ауылдық округінде орналасқан №22 Елшібек батыр атындағы жалпы орта мектебін күрделі жөндеуден жұмыстары жүргізіліп, Атамекен елді мекені А.Байтұрсынов атындағы жалпы орта мектебі қатты отыннан көгілдір отынға ауыстырылды.

Ауылдық округ тұрғындарының басым бөлігі жылыжай шаруашылығымен айналысады. Осы орайда, жылыжай иелеріне қыстық өнімдерін алу үшін жылыту маусымындағы шығындарының бір бөлігін өтеуге қолдау көрсету мақсатында құжаттар рәсімделіп, мемлекет тарапынан субсидия бөлінді. Атамекен елді мекеніндегі ауыз су ұңғымасының ақауларына жөндеу жұмыстары жүргізіліп, ретке келтірілді. Сонымен қатар, «Construction site management» ЖШС мердігер мекеме тарапынан спорт алаңшасы Атамекен елді мекенінің тұрғындарының игілігіне пайдалануға берілді.

Ауылдық округ арқылы өтетін облыстық маңызы бар КХ-50 жол бойына жол кедергілерімен белгілері орнату, сонымен қатар ауылдық округке қарасты көшелерге аяқжол салу, асфальт жамылғысын және қиыршық тас төсеу жұмыстары жүргізілуде.

Кездесу барысында аудан әкімінің міндетін уақытша атқарушы М. Байгабулов тұрғындарды тарапынан айтылған талап-тілектерін тыңдап, заң аясында жауап берді. Жиынға қатысушы тұрғындар көкейдегі сауалдарын жолдап, мардымды жауаптар алды.