Жыртқыш аңдар циркте өнер көрсетпейтін болды

Өзбекстан жыртқыш аңдардың циркте өнер көрсетіп, қойылымдарға қатысуына тыйым салмақ, деп хабарлайды Orda.kz. 

Қазақстан ұлттық арнасының мәліметінше, ел үкіметі келесі жылдың 1 қаңтарынан бастап жабайы жануарларды мемлекеттік және көшпелі цирктерде ұстауға рұқсат бермеген. 

“Жабайы аңдардың көшпелі цирктерде өте ауыр жағдайда өмір сүретіні, үйретушілердің оларға қатігездік танытатыны жайлы дерек көп. Ойын тамашалуға барған баланы немесе ересек адамды жыртқыштың жарақаттаған кездері де аз емес. Бұл өте қынжыларлық жағдай”, - дейді эколог маман.

Әлемнің көптеген елдері жабайы жануарларды циркте немесе зообақта ұстау тәжірибесінен бас тартып жатыр.

“Үндістан билігі 2009 жылы ойыншы пілдердің барлығын табиғатқа жіберу туралы шешім қабылдаған. Бұл бір ғана мысал, мұндай мемлекеттер қатары жыл санап артуда. Бүгінде цирктің немесе жеке тұлғаның иелігінде болуына тыйым салынған аң-құстың тізімі жасалған. Олардың қатарына аю, арыстан, жолбарыс, қасқыр, жылан мен маймыл секілді хайуанаттар, жыртқыш құстар кіреді. Бұған дейін циркте өнер көрсеткен жануарлар енді бірер айдан соң зообақтар мен арнайы питомниктерге табыстала бастайды”, - дейді Экология және қоршаған ортаны қорғау министрлігінің бас маманы Александр Казаков.