ТҮРКІСТАН ОБЛЫСЫ: “БІР МАҚСАТ ЖОЛЫНДА” КІТАБЫНЫҢ ТҰСАУКЕСЕРІ ӨТТІ

Түркістан облысы Бәйдібек ауданында кітап тұсаукесері өтті, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Қазақстан Республикасы мәслихаттарының құрылғанына 30 жыл толуына орай Жастар сарайында аудандық мәслихат депутаттарының ел алдындағы қызметі мен сіңірген еңбектерін дәріптеу, кейінгі ұрпаққа өнеге ретінде қалдыру мақсатымен  шығарылған «Бір мақсат жолында» кітабының тұсау кесері өтті.

«Бір мақсат жолында» кітабының лентасын аудан әкімінің орынбасары Бағдатбек Жанғазиев, аудандық мәслихаттың төрағасы Имангелді Түймебаев,  аудандық қоғамдық кеңестің төрағасы Бақыт Омарбеков, Қазақстанның Құрметті журналисі Серікбай Тұржан және ардагерлер кеңесінің төрағасы, жазушы Бағдат Қалаубай қиды.

Сонымен қатар, салтанатты шарада  ауданның әлеуметтік-экономикалық дамуына үлесін қосқан бірқатар азаматтар «Қазақстан мәслихаттарына 30 жыл» мерекелік медалімен марапатталды. 

Шараға қоғамдық ұйым өкілдері, аудандық қоғамдық кеңестің мүшелері, аудандық мәслихаттың барлық шақырылымындағы депутаттары, бірқатар сала басшылары мен қызметкерлері қатысты.