ТҮРКІСТАН ОБЛЫСЫНДАҒЫ ӨҢІРЛЕРДЕ СПОРТ АЛАҢШАСЫ ПАЙДАЛАНУҒА БЕРІЛДІ

Түркістан облысында спортты дамыту мақсатында спорт алаңшалары ашылды, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Келес ауданында демеушілер есебінен салынған спорттық ашық алаңша пайдалануға берілді. Игі шараға қатысқан аудан әкімі Жәнібек Ағыбаев  демеуші болған азаматқа алғыс білдіріп, ауыл жастарын және тұрғындарын жаңа спорт нысанының пайдалануға берілуімен құттықтады.

— Түркістан облысының депутаты  Бахыт Мүсірәліұлы Басымбектің демеушілігімен бүгінгі күні ауданымыз тағы бір заман талабына сай 800 шаршы метр құрайтын спорттық ашық алаңшамен толығып отыр. Бахыт Мүсірәліұлының бұл бастамасы көптеген ауданымыздың азаматтарына үлгі болары анық. Болашақта жастарымыз салауатты өмір салтын ұстап дене шынықтыру мен спорттың бұқаралығын    арттырады деп сенемін. Спортшыларымыз ауданымыздың намысын қорғап, көк туымызды көкте желбірете берулеріңізге тілектестігімді білдіремін, - деді аудан басшысы Жәнібек Есенұлы. 

Бүгінде Келес ауданында жалпы 229 спорт нысандары жұмыс істейді. Оның ішінде, 1 стадион, 10 футбол манежі, 54 спорт зал,   20  ашық спорт алаңшасы және 144 жазықтық ашық алаңдары бар.

«Ауыл-Ел бесігі» жобасы шеңберінде Абай ауылындағы Асан қайғы көшесі бойынан  250 орындық спорт кешенінің құрылысы бастау алған. Қазіргі таңда Қошқарата және Біртілек ауылдық округтерінде  4 спорт алаңшасын салу бойынша жұмыстар жүргізілуде.

Соңғы екі жыл ішінде Келес өңірінде жалпы 8 спорт нысаны қолданысқа берілді. Оның ішінде 2 нысанды кәсіпкерлер жеке қаражаты есебінен салса, қалғаны жергілікті бюджет есебінен жүзеге асырылды.