ТҮРКІСТАН ОБЛЫСЫ: ҚОС ЕЛ АРАСЫНДАҒЫ ШЕКАРА БЕКЕТІ ҚАЙТА АШЫЛМАҚ

Қазақстанның Өзбекстандағы Елшісі Бейбіт Атамқұлов Түркістан облысының Келес ауданындағы Достық елді мекенінде болып, Қазақстан Республикасы мен Өзбекстан Республикасы шекарасындағы «Қ.Қонысбаев» шекара кеден бекетін қайта ашу бойынша атқарылып жатқан жобалармен танысты, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Келес ауданының әкімі Жәнібек Ағыбаев жергілікті тұрғындардан шекара бекетін қайта ашуға сұраныс туындап отырғанын жеткізіп, бұл жоба жүзеге асқан жағдайда екі ел арасындағы сауда-саттық пен өңірдің экономикалық дамуына және көптеген жұмыс орындарының ашылуына өз септігін тигізерін атап өтті. 

– Өзіңізге белгілі Түркістан облысы, Келес ауданындағы Ұшқын ауылдық округінің Достық елді мекеніндегі Қазақстан Республикасы мен Өзбекстан Республикасы шекарасындағы «Қ.Қонысбаев» шекара кеден бекеті 2007 жұмысын тоқтатқан. Бүгінгі таңда аталған шекара бекетін қайта ашуға сұраныс туындап отыр. Шекара бекеті халқы тығыз орналасқан Өзбекстан Республикасы, Ташкент облысының Жаңа-жол ауданы мен Түркістан облысының Келес ауданын қосатын автожолдың 13-ші шақырымында орналасқан.  Жаңа-жол қаласы мен Абай ауылының аралығындағы «КХ-20 Абай-Калхабад» автожолы 2018 жылы күрделі жөндеуден өткізілген. Келес ауданының Ұшқын ауылдық округінің оңтайлатылған жобасында Достық елді мекенінің шекара маңынан 10,0 га жер логистикалық орталық ашуға қарастырылған, - деді аудан әкімі Жәнібек Есенұлы.    

Сондай-ақ, аудан басшысы Қазақстанның Өзбекстандағы Елшісі Бейбіт Атамқұловқа шекара бекеті ашылған жағдайда «Қапланбек» және «Б.Қонысбаев» кеден бекеттеріндегі автокөлік пен халықтың кептелісін азайытуға сеп боларын жеткізді. Өз кезегінде Бейбіт Бәкірұлы Жоба ауқымы туралы егжей-тегжейлі зерттеу қажеттілігін айтып, алдағы уақытта тиісті шешім қабылданатынын жеткізді.