ТҮРКІСТАН ОБЛЫСЫ : «ҚЫС-2024» РЕСПУБЛИКАЛЫҚ КОМАНДАЛЫҚ-ШТАБТЫҚ ОҚУ-ЖАТТЫҒУЫ ӨТУДЕ

Түркістан облысы Келес ауданда төтенше жағдайда жұмыла жұмыс істеуі тиіс қызмет түрлерінің дайындықтары пысықталды. «Қыс – 2024» республикалық командалық-штабтық оқу жаттығуы кезінде шартты түрдегі оқыс оқиғалар әзірленіп, құтқарушылар, полиция бөлімі, жедел жәрдем, коммуналдық қызмет түрлері дабылмен көтерілді, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап.

Аудан әкімінің орынбасары Сүлеймен Жылқыбаев, аудандық төтенше жағдайлар бөлімінің бастығы Хайрулла Кеңесов жеке құрамның материалдық-техникалық қамтамасыз етілуін және жауынгерлік дайындығын тексерді.Оқу-жаттығудың мақсаты – қыс кезеңіндегі төтенше жағдайлар кезінде шұғыл әрекет ету жасағының, күштер мен құралдардың іс-әрекетінің дайындығын тексеру болып табылады.

– Келес ауданында азаматтық қорғаудың аумақтық құрылымдары аудандағы тиісті мекемелермен бірге құрылып аудан әкімінің өкімі шыққан. Өкімнің 4-қосымшасына сәйкес Келес ауданының азаматтық қорғаудың жоғары дайындықтағы шұғыл ден қою жиынтық жасағы құрылған. Осы шұғыл ден қою жиынтық жасағының құрамында Келес ауданы Абай ауылында орналасқан №19 өрт сөндіру бөлімінен, «Келес қызмет» мекемесінен, Жедел медициналық көмек бригадасы, аудандық полиция бөлімімнен, аудандық тұрғын үй коммуналдық шаруашылық, жолаушылар тасымалдау және автокөлік жолдары мекемесі арқылы басқада тиісті мекемелермен жалпы барлығы 32 техника, 72 адам дайындыққа келтірілген, - деді Келес ауданының төтенше жағдайлар бөлімінің бастығы, азаматтық қорғау подполковнигі Хайрулла Кеңесов. 

Оқу-жаттығуды басқару штабы Абай ауылында орналасқан. Оқу-жаттығуға жергілікті атқарушы органдар, орталық мемлекеттік органдар, облыстық және аудандық қызметтер мен азаматтық қорғау құралымдары тартылуда. Оқу-жаттығу аясында республика бойынша ТЖ жою жөніндегі іс-қимылдарды пысықтау бойынша командалық-штабтық жаттығулар, авариялық-құтқару қызметтерімен және азаматтық қорғау құралымдарымен практикалық іс-қимылдар өткізілетін болады.

Айта кетейік, 2024 жылдың 21-22 қараша аралығында Келес ауданында «2024 жылғы қыс кезеңіндегі төтенше жағдайларды жою кезіндегі іс-қимылдарға азаматтық қорғау мемлекеттік жүйесінің басқару органдарын, күштері мен құралдарын даярлау» тақырыбында «Қыс-2024» республикалық командалық-штабтық оқу-жаттығуы өтуде.