Ақтөбеде ерлі-зайыпты өзіне өтініш айтқан азаматты соққыға жықты

Ақтөбедегі ойын алаңдарының бірінде ерлі-зайыпты қоқыс тастамауды өтінген азаматты соққыға жыққан, деп хабарлайды Bugin.kz порталы.

Сот олардың әрекетін бұзақылық деп танып, 3 жылға бас бостандығын шектеу жазасын тағайындады. Оқиға ойын алаңдарының бірінде болған. Мас күйде отырған ерлі-зайыптыға сол аумақтан өтіп бара жатқан азамат балалар ойнайтын жерге қоқыс тастамауды сұраған. Алайда бұл ескерту жанжалға ұласып, ерлі-зайыпты ер адамды соққыға жыққан. 

“Мен қонақтан үйге келе жатқанмын. Ойын алаңында отырған адамдарға қоқыс тастамауды сұрадым. Бірақ олар менімен сөзге келіп, ұрып тастады. Кейін полиция келіп, барлығымызды бөлімшеге алып кетті. Қазір мен оларды кешірдім, ешқандай шағымым жоқ", - деді жәбірленуші сотта. 

Сот ерлі-зайыптының үш баласы бар екенін және олардың айыбын мойындағанын ескере отырып, жеңіл жаза тағайындады. Оларға 3 жылға бас бостандығын шектеу жазасы белгіленді.