ТҮРКІСТАН ОБЛЫСЫНАН ДЖИУ-ДЖИТСУДАН ӘЛЕМ ЧЕМПИОНЫ ШЫҚТЫ

Польша мемлекетінің Краков қаласында өткен шығыс жекпегі джиу-джитсудан әлем чемпионатында Келестік спортшы Досбол Ережеп 70 келі  салмақ дәрежесінде чемпион атанды, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Досбол Ережеп – фулл контакт, клосс контакт және граунд файт сайыстарында барлық қарсыластарын айқын жеңіп, үш дүркін әлем чемпионы атанды. Досбол бірінші жекпе жегін Тунис елінің спортшысына қарсы өткізіп айқын басымдықпен жеңіске жетсе, екінші жекпе жегінде Польша елінің намысын қорғаған спортшыны тізе бүктірді. Одан әрі Испания елінің спортшысын ойсырата жеңіп, чемпионаттың финалына шықты.

Байрақты бәсекенің финалында Украйна елінің спортшысын жеңіп қарсылас шақ келтірмеді.  Бұл жеңіс – Досбол Ережептың спорттық мансабындағы үлкен жетістіктерінің бірі ғана емес, сонымен қатар Қазақстанның джиу-джитсу спортының беделін халықаралық деңгейде көтеруге қосқан маңызды үлесі.

Айта кетсек, Польша мемлекетінің Краков қаласында шығыс жекпегі джиу-джитсудан әлем чемпионаты  2024 жылдың 30 қараша күні өтті.