Қашпақ болған: Оралда әскерге шақырылған жігіт биіктен құлап кетті

Оралда әскерге шақырылған төрт жігіт облыстық жинақтау пунктінен қашқан, деп хабарлайды Bugin.kz Nur.kz-ке сілтеме жасап. 

30 қараша күні төрт әскерге шақырылушыны полиция қызметкерлері алып келген. БҚО қорғаныс істері жөніндегі департамент бастығының орынбасары үшінші қабаттан құлап, жарақат алған азаматтың ауыр халде жатқанын айтты, БҚО қорғаныс істері жөніндегі департамент бастығының орынбасары Альберт Бекмұхановтың мәлім еткеніндей, оқиға 1 желтоқсанға қараған түні болған. Оның сөзіне қарағанда, 30 қараша күні төрт әскерге шақырылушыны полиция қызметкерлері алып келген. 

“Түнгі сағат 02.00-де үшінші қабатта терезеге биыл қондырылған темір торды сындырған. Тоғыз одеялоны, соның ішінде үшеуін жыртып бір-біріне байлап, үшінші қабаттың терезесінен секірген. Сол кезде олардың біреуі ауыр жарақат алған. Жедел жәрдем шақырылып, емдеу мекемесіне жеткізілді. Департамент және медициналық қызмет бастығы барып, халін білді, қазір жағдайы өте нашар", - дейді Альберт Бекмұханов. 

Оның айтуынша, Қылмыстық кодекстің 387-бабына (әскери қызметтен жалтару) сәйкес қылмыстық іс қозғалып, Абай полиция бөліміне қолдаухат жіберілген. Егер әскерге шақырылушы тергеп-тексеру органы iстi сотқа бергенге дейiн әскерге шақыру пунктiне өз еркiмен келсе, ол қылмыстық жауаптылықтан босатылады. Қашқан жастардың үшеуі келесі күні шақыру учаскесіне қайтып келген. Бекмұханов ауруханада жатқан жігіт 2023 жылы дипломын алғанын, осыған дейін бірнеше рет әскерге шақырылғанын айтты.