Вайнерлер Мейіржан Төребаев пен Мейірхан Шерниязов не істеп жүр?

Вайнерлер Мейіржан Төребаев пен Мейірхан Шерниязов жұмысқа орналасты, деп хабарлайды Bugin.kz порталы. 

Олар қазір сот үкіміне сәйкес, минималды қауіпсіздік мекемесінде жазасын өтеп жатыр. Оларға жұмыс уақытына колониядан шығуға рұқсат етілген.

"Аталған сотталғандар Алматыдағы ұйымдарда мекеме әкімшілігі мен жұмыс беруші арасындағы келісімшарт негізінде жұмысқа орналастырылды. Минималды қауіпсіздік мекемелерінде сотталғандар күн тәртібі аясында жұмысқа шығып, колонияға қайта оралады. Мекеме әкімшілігі олардың келіп-кетуі барысында заң талаптарын сақтау және оны бұзудың салдары туралы профилактикалық әңгімелер жүргізіп тұрады", – деп хабарлады ҚР ІІМ Қылмыстық-атқару жүйесі комитеті.

Сондай-ақ, минималды қауіпсіздік мекемелерінде қарапайым жағдайда жазасын өтеп жатқан сотталғандар жатақханаларда тұратыны белгілі болды.

Айта кетейік, қаржы пирамидасын құрды деп айыпталған танымал вайнерлердің ісі 2022 жылдың 12 желтоқсанда сотқа жолданған еді.

Соттың хабарлауынша, Төребаев пен Шерниязовтан басқа сотталушылардың барлығы Қылмыстық кодекстің екі бабы бойынша кінәлі деп танылды. Атап айтар болсақ,  217-бап - "қаржы пирамидасын құру және басқару" және 262-бап - "ұйымдасқан топ, қылмыстық ұйым құру және басқару". Вайнерлер 5 жылға бас бостандығынан айырылған.