ТҮРКІСТАН ОБЛЫСЫ: «ҚЫС-2024» РЕСПУБЛИКАЛЫҚ КОМАНДАЛЫҚ-ШТАБТЫҚ ОҚУ-ЖАТТЫҒУЫ ӨТТІ

Бүгін ауданда қыс мезгілінде орын алуы мүмкін төтенше жағдайлардың алдын алу және оларға тиімді әрекет ету мақсатында «Қыс-2024» республикалық командалық-штабтық оқу-жаттығуы өтті. Аталған оқу-жаттығуға аудан әкімі Қайрат Жолдыбайұлы қатысып, аудан деңгейінде төтенше жағдай орын алған кезде оны жоюға жұмылдырылатын азаматтық қорғау қызметтері мен құрылымдардың әзірлігін тексерді, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.

Аудан басшысы алдымен инженерлік қызметтің әлеуетін бақылап, техникаларымен танысып, қысқа дайындығын бағамдады.

Оқу-жаттығудың алғашқы сәтінде «Дабыл-1001» сигналы қосылып, басқару органдарының күштері мен құралдарын даярлыққа келтіру үшін жергілікті атқарушы органдар мен азаматтық қорғау қызметтеріне тиісті хабарлама берілді. Жоспардан тыс аудандық төтенше жағдайлардың алдын алу және жою бойынша комиссияның отырысы өткізіліп, барлық жауапты қызметкерлер мен мамандарға нақты тапсырмалар жүктелді.

Авариялық құтқару және шұғыл жұмыстар жүргізу үшін орындар анықталып, олар бойынша маршурттар белгіленді. Оқу-жаттығуға аудандық төтенше жағдайлар бөлімі, ішкі істер бөлімі, «Оңтүстік Жарық Транзит» ЖШС, Отырар аудандық электр желілері, байланыс торабы, аурухана және басқа да тиісті бөлімдер мен мекемелердің қызметкерлері қатысты.

Оқу-жаттығу барысында барлық жауапты қызметтер өзара үйлесімді жұмыс атқарып, қыс мезгілінде орын алуы мүмкін төтенше жағдайларға қарсы дайындықтарын пысықтады.

Құрылымдардың барлығы аудан әкіміне қысқа дайын екендіктерін жеткізді. «Қыс-2024» республикалық командалық-штабтық оқу-жаттығудың соңында аудан әкімі барлық құрылымдардың өкілдеріне қыс мезгіліне дайын болу қажет екенін айтып, азаматтық қорғау қызметі мен құрылымдардың жұмысына сәттілік тіледі.