ТҮРКІСТАН ОБЛЫСЫНДА АГРАРЛЫҚ САЛАНЫ ДАМЫТУ МӘСЕЛЕЛЕРІ ЖӨНІНДЕ МӘЖІЛІС ӨТТІ

Түркістан облысы Бәйдібек ауданыны әкімі Ерлан Нұрмахановтың төрағалығымен ауыл шаруашылығы соның ішінде егін шаруашылығының мәселелері бойынша мәжіліс өтті, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Жиында Ерлан Заипұлы нарықтағы егін шаруашылығы өнімдерінің бағасының төмендігіне, бұл өз кезегінде астық өндірісінің табыстылығына кері әсерін тигізіп отырғандығына тоқталды. Сондықтан қазіргі қиын кезеңде шаруалар егістік жерді игеру бағытындағы  күрделі салымдардан бас тарту  қауіпі бар екендігін жеткізді.

- Ауыл шаруашылығы ауданымыз үшін де экономиканың негізгі басым бағыты, əлеуметтiк жағынан да ерекше маңызға ие.  Мемлекет басшысы еліміздің ауыл шаруашылығы өнімдерінің көлемін екі есе арттыру міндетін жүктеп отыр. Біз жоғары сапалы тұқымдар, тыңайтқыштар мен озық технологияны пайдаланбасақ, пайда көру циклі бір жылды құрайтын  осы маусымдық  ауа райына байланысты егін шаруашылығы өнімдеріне тәуелді  күйде қаламыз. Бүгінгі кездесудің негізгі мақсаты осы салада еңбек етіп жүрген аудан дихандары, яғни Сіздердің өзекті мәселелеріңізді тыңдап, шешу жолдарын қарастыру және осы жиын барысында ұсынылған өтініштерді талқылап, жүзеге асуына көмектесу, -деді аудан әкімі. 

Жиынның күн тәртібіндегі мәселе бойынша Қазақстан Республикасы топырақ зерттеу орталығы директоры Марат Атемов, профессор, ауыл шаруашылығы ғылым докторы, агроном Жеңісбек Әбдірайымов, «Қазақстан аграрлық сараптамасы» АҚ Түркістан филиалының  өкілі  Қарлығаш Иманбекова және «Kaz Kioti»  ЖШС-нің сату бөлімінің басшысы Жансая Базарбекова хабарлама жасап, еліміздегі аграрлық саланы дамыту жөніндегі озық тәжірибелер мен жетістіктерді бөлісті.

Мәжілісте жалпы егін шаруашылығы саласындағы кездесіп жатқан өзекті мәселелер айтылып, оны шешу жолдарын қарастыру жөнінде дихандардың өтініштері мен ұсыныс-пікірлері тыңдалып, талқыланды.

Жиынға барлық ауылдық округтерден ірі агроқұрылымдар,  аудандық мәслихат депутаттары, мемлекеттік кірістер басқармасы мен салаға қатысты бөлімдердің мамандары қатысты