ВОЛЕЙБОЛДАН АУДАН БІРІНШІЛІГІНІҢ ЖЕҢІМПАЗДАРЫ АНЫҚТАЛДЫ

Түркістан облысы Жетісай аудандық ішкі саясат бөлімінің «Жастар ресурстық орталығы» КММ мен «Жетісай спорт клубы» КММ ұйымдастыруымен «Салауатты ұлт – салауатты ұрпақ» ұранымен волейболдан жастар арасында аудан біріншілігі бастау алған болатын. Екі айға созылған байрақты бәсекеге жалпы 11 әуесқой команда қатысып, өзара бақ сынасты. Бүгін біріншіліктің қорытынды кездесулері өткізіліп, жеңімпаз командалар анықталды, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап.

Спорттық шараның мақсаты – жастардың спортқа деген қызығушылығын одан әрі шыңдап, отандық волейбол деңгейін арттыру, ұрпақтар сабақтастығын насихаттап, бұқаралық спортты дамыту, жастар арасында волейбол спортына деген қызығушылықты арттырып, аға буын өкілдерінің ізін басқан жас спортшыларға тәжірибелерімен бөлісіп, кәсіби біліктіліктерін үйрету.

Б.Саттарханов атындағы спорт кешенінде өткен финалдық ойындарға 6 команда жолдама алып, жүлделі орындарды сарапқа салды. Қызықты әрі өзара тартысты өткен ойындардың нәтижесінде жүлделі ІІІ орынды Мақтаарал ауданынан келген «Қ.Сәтпаев» атындағы жалпы орта мектебінің құрамасы иеленсе, ІІ орын «Қайнар» мектеп-гимназиясының, ал, І орын «Б.Момышұлы» мектеп-гимназиясының әуедоп шеберлеріне бұйырды.

Сонымен қатар, жаркүйерлер мен көрермендердің көзайымына айналып, керемет ойын өрнегін көрсеткен Нышанбек Асылбек «Үздік ойыншы», Нұрасыл Сапарбаев «Үздік доп ұзатушы», Алпамыс Көмеков «Үздік шабуылшы», ал, Қайнар Егізбаев «Үздік қорғаушы» номинацияларымен марапатталды.

Тартысты өткен спорттық шараның жабылу салтанатына Жетісай аудандық мәслихатының төрағасы Медет Қасымов пен аудандық мәслихат депутаты Олжас Қаныбеков, «Жетісай спорт клубы» КММ директоры Таласхан Битуреев пен аудандық волейбол федерациясының президенті Жантөре Тоқтыбай, федерациясы хатшысы Бауыржан Ботабаев пен ауданық «Жастар ресурстық орталығы» КММ басшысы Нұршарифиддин Мейірбек арнайы қатысып жеңімпаздарды құттықтады. Жүлделі орындарға ие болған командалар мен түрлі номинацияларға ие болған жекелеген ойыншыларды дипломдармен, бағалы сыйлықтармен марапаттады.