ТҮРКІСТАН ОБЛЫСЫНДА ЖЕТІСАЙ АУДАНЫ ОБЛЫСТЫҚ ФЕСТИВАЛЬДЫҢ ЖҮЛДЕГЕРІ АТАНДЫ

Мәдениет пен өнер – қоғамның айнасы, елдің рухани мұрасы, асыл қазынасы десек қателеспейміз. Өйткені, өркениетке қол созған еліміз үшін экономикалық өсіммен қатар елдің рухани бай құндылықтарын дамыту мәселесі үлкен маңызға ие, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Түркістанның туристік әлеуеті мен өңіріміздің рухани дамуын, мәдени мұрасын кеңінен дәріптей отырып азаматтардың мәдени білімін тереңдету, ел дамуы үшін мәдениеттің де озық деңгейге көтерілуіне ықпал жасау мақсатында жыл сайын дәстүрлі түрде өтетін «Өнерлі өлке» облыстық фестивалінің үздіктері анықталды.

Ағымдағы жылдың маусым-қазан айлары аралығында өткен фестивальда барлық аудан-қалалардың қылқалам және қолөнер шеберлері, аспаздары ұлттық тағамдардың, ал, кітапханашылары өздері мекен ететін аудан-қалалардың тарихы мен жетістіктерінен сыр кітап көрмелерін өткізсе, мәдени орталықтар салт-дәстүр мен әдеп-ғұрыпқа байланысты сахналастырылған көріністерін көрсетті. Ұлттық спорт түрлерінен түрлі жарыстар өткізіліп, дәстүрлі өнерге арналған концерттік бағдарламалар, көше театры сияқты халық театрының қойылымдары, сол өңірден шыққан өнерпаздарының гала-концерті қойылды.

Кестеге сәйкес белгіленген күндері Түркістан қаласындағы «Керуен сарай» және «Этно ауыл» демалыс аймақтарында түркістандық тұрғындар мен қала қонақтарына өз өнерлерін паш еткен жетісайлық өнерпаздар жүлделі ІІ орынға ие болды.

Облыстық мәдениет басқармасы мен облыстық мәдениет және халық шығармашылығы орталығының ұйымдастыруымен өткен шараның жеңімпаздарын анықтау шарасына Түркістан облысы әкімінің орынбасары Ертай Алтаев қатысып, жеңімпаздарды марапаттады.

«Биыл Түркістан облысының құрылғанына алты жыл толып отыр. Атауы мыңжылдықтарға кеткенмен, құрылымы жаңа біздің өңір үшін бұл уақыт жаңару мен дамудың кезеңіне айналды. Өздеріңізге белгілі, Мемлекет басшысы Қасым-Жомарт Тоқаевтың Түркістанға ерекше мәртебе беру туралы тапсырмасы аясында арнайы заң жобасы әзірленіп, Парламент қарауында жатыр . Бұл біздің өңірге жүктелген мәртебелі міндет, жоғары жауапкершілікті талап ететін бастама болып отыр. Бұл игілікті істердің жүзеге асуына мәдениет мамандарының да қосар үлес зор болмақ. Дәстүрлі ұйымдастырылған «Өнерлі өлке» облыстық өнер фестивалі қала тұрғындары мен қонақтарына ерекше тарту болды. Аудан, қаладан келген өнер ұжымдары, талантты жастар ұлттық құндылықтарымыз бен заманауи өнердің тамаша үйлесімін көрсете білді. Мен осы орайда, аталған фестивалге үлес қосып, жоғары деңгейде өнер көрсеткен баршаңызға алғысымды білдіремін» деді Ертай Кенжебекұлы.

Қазылар алқасының шешімімен бас жүлде Сарыағаш ауданына бұйырса, І орынға Сауран және Созақ аудандары, ІІ орынға Ордабасы, Қазығұрт және Жетісай аудандары ие болды. Ал, фестивальдың ІІІ орнын Түлкібас, Отырар аудандары мен Түркістан қаласы иеленіп, қаржылай сыйлықтармен, арнайы дипломдармен марапатталды.

Одан бөлек, «Ауыл – мәдениеттің бастауы» ауылдық мәдениет үйлері мен клубтар арасында өткен облыстық байқаудың жеңімпаздары, V Дүниежүзілік көшпенділер ойынында облыс тарапынан ұйымдастырылған іс-шаралардың жоғарғы деңгейде өтуіне атсалысқан мәдениет саласының қызметкерлеріне де құрмет көрсетілді.