Өзіне қол жұмсаған: Ақтөбе облысында тағы бір әскери көз жұмды

Ақтөбе облысының Ырғыз ауданында әскери комиссар өзіне қол жұмсады, деп хабарлайды Bugin.kz порталы Ratel.kz порталына сілтеме жасап.

Қайғылы оқиға 8 желтоқсанда болған. Өлімнің себебі нақты айтылмады.  Облыстық қорғаныс істері жөніндегі департамент бұл жөнінде түсініктеме бермеген. Ал Ақтөбе гарнизонының әскери-тергеу басқармасы мен прокуратурасы да бұл туралы ақпарат айтпады. 

Сондай-ақ өткен айда Богословка полигонында 30238 әскери бөлімінің Павлодардан шақырылған мерзімді қызметтегі сарбазы Ярослав Боровец тәуліктік кезекшілікке түскен. Артиллериялық оқ-дәрілер сақталатын жеке қойманың аумағындағы 1-бекетте 3-ауысымда тұрған кезде, АК-74 автоматымен өзіне оқ атып, бетін жаралаған екен. 

Оған қоса, бірнеше күн бұрын жалдамалы пәтерде ефрейтор Шалауов өзіне қол жұмсамақ болған. Оны досы көріп асылып тұрған жерінен байқап, құтқарған.