ТҮРКІСТАН ОБЛЫСЫ: КІТАПХАНАШЫЛАРДЫҢ КӘСІБИ ШЕБЕРЛІГІН ШЫҢДАЙТЫН БАЙҚАУ

Сайрам Аудандық орталықтандырылған кітапханалар жүйесінің ұйымдастыруымен «Ардақты Ана» музейінде кітапхана саласының кәсіби құндылықтарын сақтау, кітапханашылардың кәсіби шеберлік деңгейін көтеру, кітапханалық қызмет сапасын арттыру, кітап оқуды насихаттауға бағытталған жобаларды ілгерілету мақсатында «Жылдың ең үздік кітапханашысы» атты кітапханашылар байқауы өткізілді, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.

Байқау үш кезеңнен тұрды. Байқауға аудандық орталық, аудандық орталық Балалар Кітапханасы мен ауылдық кітапханашылар қатысты. Қатысушыларды бағалайтын қазылар алқасына аудандық Мәдениет мәдениет үйінің халық шығармашылығын дамыту бөлімінің басшысы Гаухар Тукенова, Оңтүстік Қазақстан индустриалды-ннновациялық колледжінің кітапханашысы Клара Ошаева, «Сайрам аудандық орталықтандырылған кітапханалар жүйесі» коммуналдық мемлекеттік мекемесі директорының міндетін уақытша атқарушы Зульфия Смайлова мүшелік етті.

Шараның алғы сөзін аудандық мәдениет, тілдерді дамыту, дене шынықтыру және спорт бөлімінің басшысы Даулетхан Алашбаев ашып, кітапханашыларға сәттілік тіледі.

Байқау барысында аудандық Қ.Жандарбеков атындағы мәдениет үйінің әншісі Нұрсұлтан Асқар ән шырқады.

Кітапханашылардың шығармашылық бастамаларын, кәсіби шеберлігін шыңдаған байқаудың қорытындысы бойынша М.Оразалиев ауылы кітапханасының кітапханашысы Гауһар Түзелова бас жүлдені иеленді. І орынды - Ханқорған ауылы кітапханасының кітапханашысы Майра Сералиева, ІІ орынды – аудандық орталық кітапхананың кітапханашысы Роза Абдыжаппарова, ІІІ орынды - Таскешу ауылы кітапханасының кітапханашысы Айгул Абдураманова алды. Ал, аудандық орталық балалар кітапханасының кітапханашысы Амина Амантай «Білікті кітапханашы, №12 Қарабұлақ Ауыл Кітапханасының кітапханашысы Нилюфар Абдукаримова «Жаңашыл кітапханашы» номинацияларымен марапатталды.

Барлық қатысушыларға сый-сияпат пен дипломдар табысталды.