Мүфтият: “Жолды жауып, намаз оқуға болмайды”

Алматыдағы мешітке намаз оқуға жиналған жамағат көшеге шығып кетті. Алматы Орталық мешітінің баспасөз қызметі 6 желтоқсанда болған оқиғаға байланысты түсініктеме берді, деп хабарлайды Bugin.kz порталы.

Ақпаратты ҚМДБ ресми өкілі Ағабек Қонарбайұлы әлеуметтік желі арқылы таратты.

6 желтоқсанда әлеуметтік желіде жолды жауып, намаз оқыған бір топ ер адамның видеосы тарады. Тіпті жолдан жедел жәрдем көлігі де өте алмаған. Ер адамдардың Алматы Орталық мешітінде алғаш рет жұма намазына келушілер екені белгілі болды. Парыз намазы басталғанға дейін мешіт қызметкерлері жамағатты мешіт ауласына орналастырған. Алайда парыз намазы басталған соң мешіттің оң жақ бөлігі яғни, М.Мәметова көшесінің бір бөлігінде ер адамдар намаз оқуға кіріскен. 5 минуттық құлшылық парызын өтеу салдарынан көше кептелісі пайда болды. 

“Жұма намазын оқу кезінде жолды жауып, басқа адамдарға зиян тигізуге болмайды. Сол себепті, баршаңызды намазға ертерек келіп, тиісті көрсетілген орындарға жайғасуды, жолдарды жаппауды, көліктерді де дұрыс орынға қоюды, талап пен тәртіпті қатаң сақтауларыңызды сұраймыз”, - деп ақпарат таратты Алматы Орталық мешіті.

ҚМДБ ресми өкілі намаз оқуға тыйым салынған жерлерді атады. Оның айтуынша, қоқыс жиналған жерде, мал соятын орында, қабір басында, жолдың үстінде, моншада, мал суарылатын орында, қағбаның үстінде намаз оқуға болмайды.