ТҮРКІСТАН ОБЛЫСЫ КЕЛЕС АУДАНЫНА 3,8 МЛРД ТЕҢГЕНІ ҚҰРАЙТЫН ИНВЕСТИЦИЯ ТАРТЫЛДЫ

Түркістан облысы Келес ауданында жыл басынан бері  10 кәсіпкерлік нысан іске қосылып, жалпы құны  3,8 млрд.теңгені құрайтын инвестиция тартылды. Нәтижесінде  235 адамға жаңа жұмыс орындары ашылды. Бұл туралы Келес ауданының әкімі Жәнібек Ағыбаев өңірлік коммуникация алаңында өткен брифингте мәлімдеді, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Келес ауданының әлеуметтік-экономикалық дамуы бойынша көрсеткіштер жыл өткен сайын артып келеді. Атап айтқанда жалпы өңірлік өнім көлемі өткен 10 айдың қорытындысымен 86,5 млрд теңгеге жетті.  Аталған саладағы жылдық жоспар 110,7 млрд теңгені құрайды. Сонымен қатар, ауылшаруашылығы өнімінің көлемі жыл басынан бері 61,7 млрд. теңгеге жетті. Ал, аудан экономикасының негізгі капиталға бағытталған инвестиция көлемі өткен жылы  21,2 млрд.теңгені құраса, 2024 жылы 32 млрд.теңге жоспарланып, 10 ай қорытындысымен 24,3 млрд. теңгеге жетті.

Аудан аумағында жалпы 26 мың гектар суғармалы егіс алқаптары орналасқан.

2024 жылы Келес ауданы бойынша жалпы 22 871,5 гектар егіс егілді. Жаңа технологияларды енгізу және ағын суды үнемдеу мақсатында 2024 жылдың 10 айында  1300 гектар жерге жаңбырлатып суғару әдісі енгізілді.

2025 жылы жалпы құны 62,75 млрд.теңгені құрайтын 4 инвестициялық жобаны іске асырылып,  1740 адамға жаңа жұмыс орындарын ашу жоспарлануда. Мемлекет басшысының арнайы тапсырмасымен облыста «Жайлы мектеп» пилоттық ұлттық жобасы іске асырылуда. Жоба аясында Келес ауданында жаңадан 5 мектептің құрылысы жоспарланып, 2023 жылы 3 мектептің құрылыс жұмыстары басталған. Оның ішінде Ғ.Мұратбаев елді мекеніндегі 600 орындық мектептің құрылыс жұмыстарын 2024 жылдың желтоқсан айының соңына дейін аяқталып, пайдалануға тапсыру көзделген.