Келер жылы айыппұлдар қанша болады?

Келесі жылы айлық есептік көрсеткіш 3 мың 932 теңге болады. Сол себепті айыппұлдар да 6,1 пайызға өседі, деп хабарлайды Bugin.kz порталы Almaty.tv-ға сілтеме жасап. 

Жылдамдықты сағатына 10-нан 20 шақырымға дейін арттырғаны үшін берешек 5 айлық есептік көрсеткіш болады. Ол – 19 мың 660 теңге. Бұл заңбұзушылық үшін биыл 18 мың 460 теңге төлеп жүрміз. Ал сағатына 20 мен 40 шақырым арасында жылдамдықты асырсаңыз, 10 айлық есептік көрсеткіш айыппұл төлеу керек. Бұл – 39 мың 320 теңге болады. Сағатына 40 шақырымнан асып кетсе, 78 мың 640 теңге төлеуге тура келеді. Бір жыл ішінде қайта заң бұзылса, 117 мың 960 теңге айыппұл арқалайсыз.

Жол белгілерін немесе таңбаларды елемеген жағдайда, 11 мың 796 теңге көлемінде берешек қарастырылған. Көлік жүргізушісі бағдаршамның қызыл белгісіне өтіп кетсе, 39 мың теңге төлейді. Жүргінші жолымен немесе тротуарлармен көлік басқарса, 59 мың теңге шамасында айыппұл ілінеді. Көлікті дұрыс қоймағаны үшін де салынатын төлем көлемі өскен. Мәселен, тұрақ немесе тоқтау ережесін бұзсаңыз, 5 айлық есептік көрсеткіш, ал темір тұлпарыңызды тротуарда немесе гүлзарларға қойып кетсеңіз, 10 айлық есептік көрсеткіш айыппұл қарастырылған.