ТҮРКІСТАН: АУДАН ӘКІМІ ЖАҢА ИҚАНДЫҚ ТҰРҒЫНДАРМЕН ЕСЕПТІ КЕЗДЕСУІН ӨТКІЗДІ

Түркістан облысы, Сауран ауданының әкімі Мақсат Таңғатаров жылына екі рет ауыл тұрғындарымен кездесу өткізуі жоспарланған. Жылдағы дәстүрін жалғастырып, Жаңа Иқан ауылдық округі тұрғындарымен ІІ жарты жылдық бойынша есеп беру кездесуін өткізді. Кездесуге ауылдық округ әкімі Тайыр Абдиев, дербес бөлім басшылары мен жергілікті тұрғындар қатысты, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Кездесудің басты мақсаты - ауданның әлеуметтік-экономикалық дамуы, инфрақұрылымдық мәселелер мен ауыл тұрғындарының тұрмыс жағдайын жақсартуға бағытталған жұмыстарды баяндау және халықтың ұсыныс-пікірлерін тыңдау болды.

Жиын барысында ауылдық округ әкімі Тайыр Абдиев өз баяндамасын жасады. Ол өз сөзінде ауылдық округтің 2024 жылғы жетістіктері мен атқарылған жұмыстарын, сондай-ақ, алдағы жоспарларын айтып, ауыл шаруашылығы, инфрақұрылым, білім беру және денсаулық сақтау салалары бойынша бірқатар маңызды мәселелерге тоқталды. Ол сондай-ақ, тұрғындарға ауылдық округтегі жаңа жобалар мен даму бағыттары туралы мәлімет беріп, халықтың әлеуметтік жағдайын жақсарту бағытындағы жұмыстардың жалғасатынын жеткізді.

Тұрғындар өздерінің сұрақтарын қойып, ұсыныс-пікірлерін білдірді. Тиісті бөлімдер тарапынан әрбір сұраққа толық әрі нақты жауаптар берілді. Онда ауылдың инфрақұрылымын жақсарту, жолдар мен ауыз су мәселелерін шешу туралы сұрады. Сондай-ақ, ауыл шаруашылығын дамыту және жер мәселелері бойынша да бірқатар ұсыныстар айтылды.

Мақсат Таңғатаров өз кезегінде, ауданның әлеуметтік-экономикалық жағдайын жақсарту бағытында атқарылып жатқан жұмыстарды баяндап, тұрғындардың барлық сұрақтарына жауап беріп, алдағы уақытта атқарылатын жұмыстарға көңіл бөлінетінін айтты.

Бұл кездесу Сауран ауданында ашықтық пен тұрғындармен диалогтың нығаюына септігін тигізіп, ауыл тұрғындарының мәселелерін шешуде тиімді әдіс болып табылады. Жаңа Иқан ауылдық округінің тұрғындары өз мәселелерін ашық түрде көтеріп, оларды шешуге қатысты нақты қадамдар жасауға мүмкіндік алды.