Түркістан облысы: «Шаншар» әзіл-ысқақ театрының 30 жылдық мерейтойы тойланды

Бүгін Түркістан облысы, Созақ ауданы орталығында орналасқан «Мыңжылқы» мәдениет сарайында «Шаншар» әзіл-ысқақ театрының 30 жылдық мерейтойына орайластырылған концерттік бағдарлама көпшілік назарына ұсынылды, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.  

Шараға арнайы қатысқан аудан әкімі Мұхит Тұрысбеков театр ұжымын мерейтойларымен құттықтап, шығармашылық табыстар мен биік белестерге жетуді тіледі.

“Театрдың 30 жылдық тарихы – бұл тек шығармашылықтың ғана емес, қазақ мәдениетін жаңа деңгейге жетелей білді. Театр сахнасы жаңа ойлар мен жаңашылдықтарға толып, әрбір қойылымыңыз көрермендерге ерекше әсер қалдырды. Қазақ сахнасына ұлы тұлғалар мен жаңа образдар әкеліп, сол арқылы қазақ театрының болашағына даңғыл жол салдыңыздар. Алдағы уақытта да “Шаншар” театрының шыңға шығуына тілектеспін”,- деген аудан басшысы Созақ өңірі өнер мен мәдениетті ұлықтап, көптеген талантты тұлғаларды шыңдаған өлке екендігін де атап өтті.

Театр директоры Уәлибек Әдірайымовқа арнайы құттықтау хат пен ықылас гүлін табыстап, құрмет көрсетті.

Шара жан-жақты әзілмен, тапқырлықпен, музыкалық нөмірлермен түрлендіріліп, театрдың үш онжылдықтағы шығармашылық жетістіктері мен тәжірибесін паш етті. Аншлагпен өткен қойылым көрермендерге ұмытылмас әсер қалдырды. Әрбір сахналық көрініс, әзіл мен ойынның шеберлігі көрермендерге көңіл күй сыйлады.