ТҮРКІСТАН ОБЛЫСЫ: «ӨТКЕННЕН САБАҚ, БОЛАШАҚҚА ҚАДАМ» ТАҚЫРЫБЫНДА ФОРУМ ӨТТІ

Бүгін Түркістан облысы, Созақ аудандық прокуратурасының ұйымдастыруымен аудан әкімдігінің мәжіліс залында форум өтті. Жиынның басты мақсаты – пробация қызметінің есебінде тұрған азаматтарды қоғамға бейімдеу және олардың еңбекке араласуын қамтамасыз ету болды. «Өткеннен сабақ, болашаққа қадам» тақырыбындағы форумда өткен уақыттың қателіктерінен сабақ алып, болашаққа жарқын қадам жасау үшін атқарылуы тиіс шаралар талқыланды, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.  

Шараға Созақ ауданы прокурорының әділет кеңесшісі Нұрсұлтан Талғатұлы, Созақ ауданы Полиция бөлімінің бастығы, полиция полковнигі Нұрлан Жақыпұлы, Шолаққорған орталық мешітінің найб имамы Бекет Аманғалиұлы және құқық қорғау органдарының қызметкерлері, ауыл және кент округ әкімдері, салаға жауапты мамандар мен пробация есебіндегі азаматтар қатысты.

Форумды аудан әкімінің орынбасары Серік Маманов ашып, жүргізіп отырды. Күн тәртібінде бірінші кезекте Пробация Қызметінің атқарған жұмыстары мен алда тұрған міндеттері туралы Созақ ауданы Пробация Қызметі бастығының міндетін атқарушы, әділет капитаны Ақерке Маратқызы баяндама жасады. Сондай-ақ, аудан әкімдігінің ауыл шаруашылығы және кәсіпкерлік бөлімінің басшысы Қайырбек Мейірманов тұрғындардың тұрмыс сапасын арттыруға бағытталған мемлекеттік бағдарламалар жөнінде сөз қозғады.

Пробация қызметінің есебіндегі азаматтарды жұмыспен қамту және кәсіпке баулу бағытында атқарылған шаралар туралы Созақ ауданының Мансап Орталығының директоры Абай Көбенов өз баяндамасында жан-жақты түсіндірме берді. Күн тәртібінде қаралған мәселелер бойынша атқарылуы тиіс жұмыстар мен ұсыныстар жан-жақты қаралып, қажетті шаралар қабылданды.

Форум соңында жиынға қатысушыларға әсерлі қойылым ұсынылды. Бұл қойылым пробация есебіндегі азаматтар мен олардың қоғамға қайта бейімделуі үшін маңызды әрі терең мағынаға ие болды.