ТҮРКІСТАН: С. ҚОЖАНОВ АТЫНДАҒЫ МУЗЕЙДЕ БҮРКІТ АРЫНБЕКОВТІҢ 77 ЖЫЛДЫҚ МЕРЕЙТОЙЫНА АРНАЛҒАН ШАРА ӨТТІ

Бүгін Түркістан облысы, Созақ ауданындағы С.Қожанов атындағы Созақ аудандық тарихи өлкетану музейінде Қазақстан Республикасының Денсаулық сақтау ісінің үздігі, сала ардагері Бүркіт Арынбековтің 77 жылдық мерейтойына арналған шара ұйымдастырылды. «Мың алғыс Сізге, дәрігер» тақырыбындағы шара Бүркіт Арынбековтің медицина саласына қосқан үлесін, адамгершілігі мен ұстаздық жолын дәріптеуге арналды, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.  

Шара барысында Бүркіт Арынбековтің денсаулық сақтау саласындағы елеулі қызметін дәріптеу мақсатында өмірі мен еңбегін көрсететін экспозициялық бұрыштың лентасы қиылды.

Тағылымды шараны аудан әкімі Мұхит Тұрысбеков ашып, кеш кейіпкерінің медицина саласындағы жетістіктері мен атқарған қызметін айрықша атап өтті. Құттықтау хат табыс етіп, құрмет көрсетті.

Аудандық ардагерлер кеңесінің төрағасы Қабылбек Еспенбетов, музей директоры Ниязәлі Дүйсенбек және Созақ аудандық орталық ауруханасының бас дәрігері Бейбіт Төреханов шараның маңыздылығына тоқталып, жылы лебіздерін білдірді.

Сала ардагері Бүркіт Арынбеков көпшіліктің құрметіне ризашылығын жеткізді.

“Менің өмірім тек медицинаға арналып, әрбір сәтте елге қызмет еттім. Бүгінгі күн мен үшін үлкен мақтаныш. Менің еңбегімді бағалап, шараны ұйымдастырған баршаңызға алғысымды білдіремін,” – деді.

Талантты ұстаз, дәстүрлі әнші Кенжебай Шал бастаған аудандық “Мыңжылқы” мәдениет үйінің өнерпаздары әсем әндер орындап, шараға ерекше сән берді.