ТҮРКІСТАН: СОЗАҚ АУДАНЫНДА СПОРТ САЛАСЫ БОЙЫНША АТҚАРЫЛҒАН ЖҰМЫСТАР БАЯНДАЛДЫ

Бүгін Түркістан облысы, Созақ ауданы әкімі Мұхит Тұрысбеков Түркістан өңірлік коммуникация қызметінде өткен брифингте ауданда спорт саласы бойынша атқарылған жұмыстар мен алдағы жоспарлар туралы мәлімдеді. Сонымен қатар, аудан орталығында құрылыс жұмыстары жүріп жатқан 200 орындық заманауи «Спорттық-сауықтыру» кешенінің қазіргі жағдайы мен оның маңыздылығы туралы сөз қозғады, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.   

«Қазіргі таңда ауданымызда 201 спорттық нысан жұмыс істеп жатыр. Аудан орталығында бой көтеріп жатқан 200 орындық спорттық-сауықтыру кешені ауданның спорт инфрақұрылымын жаңғыртудағы маңызды қадамның бірі. Бұл кешеннің жалпы аумағы 3 гектарды құрайды және оқу-жаттығу базасымен толық жабдықталып, халықаралық деңгейдегі спорттық жарыстарды қабылдай алатын мүмкіндікке ие болады. Екі қабатты ғимаратта волейбол мен баскетбол алаңдары, күрес пен бокс залдары, сондай-ақ бассейн мен футбол алаңы орналасады», – деді аудан басшысы.

Айта кетейік, биылғы жылы аудан тұрғындарының спортпен шұғылдануына және ауданның спорттық әлеуетін арттыруға бағытталған тағы да бірқатар маңызды жобалар жүзеге асырылды. Осы жылы 5 спорттық нысан ел игілігіне берілді. Қарақұр ауылында жабық үлгідегі шағын футбол алаңы салынып, келесі жылы бұл жоба бірқатар ауылдық округтерде жалғасын табатын болады.