Түркістан: Жастар арасындағы есірткіге тәуелділікті жою мақсатында ауқымды жиын өтті

Бүгін Түркістан облысы, Түлкібас ауданы әкімдігінің үлкен мәжіліс залында тұрмыстық зорлық-зомбылықтың интернет алаяқтықты алдын алу, жастар арасындағы есірткіге тәуелділікті жою мақсатында ауқымды жиын өтті, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.   

Басқосуға аудан әкімінің орынбасары Е.Орманов, аудандық Полиция бөлімінің бастығы Б.Сұлтанов, аудан аумағындағы мекеме басшылары мен қызметкерлері, әкімдік мамандары және құқық қорғау органының қызметкерлері қатысты.

Ағымдағы жылдың 10 айында аудан аумағында әйел азаматтарына қарсы 74 қылмыс тіркелген. Оның ішінде тұрмыстық қарым-қатынаста 32 іс.

Бұл туралы жиында аудандық Полиция бөлімінің бастығы Б.Сұлтанов мәлімдеді. Ауданның бас полицейінің айтуынша, ағымдығы жылдың 15 сәуірінен бастап, ел Президентінің Жарлығымен тұрмыстық зорлық-зомбылық Заңы әкімшілік құқық бұзушылық емес, қылмыстық жауапкершілік ретінде қаралатынын жеткізіп, қазіргі таңда ауданымыздың өзінде отбасылық жан-жалдың нәтижесінен үйдің отағасына қылмыстық істер қозғалып, сотты болып жатқан жәйттердің көптеп орын алып жатқанын атап өтті.

Сонымен қатар, басқосуда бас полицей бүгінгі таңда интернет алаяқтық белең алғанын тілге тиек етіп, интрнет арқылы жасалынып жатқан қылмыстың басым бөлігі жерлестеріміздің ұялы телефонындағы өзіне қатысты ақпаратты алданып, бейтаныстарға жолдауының салдарынан орын алып жатқанын жеткізді.

Кездесу қорытындылаған аудан әкімінің орынбасары Е.Орманов, Полиция бөлімінің бастығына маңызды ақпаратпен бөліскендігі үшін алғысын білдіріп, жиналған қауымға тұрмыстық зорлық-зомбылықты болдырмау, елімізде белең алған қылмыс түрлеріне жолын кесу мақсатында насихат жұмыстарын бірігіп жүргізуге шақырды.