ТҮРКІСТАН: ТӨЛЕ БИ АУДАНЫНДА СЕНБІЛІККЕ 1200 ТҰРҒЫН ҚАТЫСТЫ

Түркістан облысы, Төлеби ауданында «Таза Қазақстан» бағдарламасы негізінде тазалық шарасы жалғасын табуда. Аптаның жұма және сенбі күндері тұрғындардың қатысуымен тұрақты түрде сенбілік ұйымдастырылып, тазалық, абаттандыру жұмыстарын жүйелі атқарылуда, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.   

Бүгін, аудан аумағында кезекті сенбілік өткізіліп, көше бойлары, арық-атыздар күл қоқыстан, жерге түскен күзгі жапырақтардан тазартылды. Сондай-ақ, қураған ағаштар бұталып, жол бойы ретке келтірілді.

Сенбілікте арнайы көліктер қоқыстарды белгіленген орынға шығарды. Мекеме қызметкерлері тұрғындармен бірлесе отырып өздеріне бөлінген аймақтардың тазалығын реттеп, белсенділіктерін танытты.

Сенбілік табиғатқа деген оң көзқарасты қалыптастыруға және ауданның санитарлық жағдайын жақсартуға бағытталып, игілікті іске 1200 адам, 18 техника жұмылдырылды.

Елді мекендерде тазалықты сақтау, экологиялық сауаттылықты көтеру, түсіндіру жұмыстары жалғасын табуда.