ТҮРКІСТАН ОБЛЫСЫНДА ЖҰМЫСТАР САРАЛАНЫП, ЖОСПАРЛАР ТАЛҚЫЛАНДЫ

Бүгін Түркістан облысы, Жетісай аудан әкімі Серік Үсенұлы Мамытовтың төрағалығымен өткен аппарат мәжілісіне аудандық құзырлы органдар мен денсаулық сақтау саласының басшылары, аудан әкімінің орынбасарлары мен бөлім басшылары, қала, кент, барлық ауылдық округтердің әкімдері қатысты, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

Күн тәртібіндегі индикаторлық көрсеткіштердің орындалуы мен ауданның әлеуметтік-экономикалық даму көрсеткіштері, бюджеттің кіріс бөлігініі жоспарға сәйкес өндірілуі және қосымша кіріс көздерін анықтау бойынша нақты атқарылып жатқан шаралар бойынша аудандық экономика және қаржы бөлімінің басшысы Өмірзақ Дүйсебаев баяндама жасаса, аудандық ауыл шаруашылығы мен жер қатынастары бөлімінің басшысы Нұртас Тұрсынбеков көктемгі дала жұмыстарына дайындықтың барысы мен мақта шаруашылығын дамыту бойынша атқарылып жатқан шараларға, құрылыс жұмыстары жүріп жатқан 210 тік дренаждардың жағдайына, су үнемдеу технологиясын енгізу бойынша шаруалармен жүргізіліп жатқан келісім-шарттардың барысына тоқталды.

Ал, аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Берік Мамбетов пен аудандық құрылыс, сәулет және қала құрылысы бөлімінің басшысы Мырзабек Абишев жыл соңына дейін аудандағы қолданысқа берілуі тиіс құрылыс нысандарының жағдайын баяндады.

Күн тәртібінде қаралған әрбір мәселе бойынша жасалған баяндамаларды жіті тыңдаған аудан басшысы берілген хаттамалық тапсырмаларға немқұрайлы қарап, бекітілген мерзімде орындамаған барлық деңгейдегі басшылардың жауапкершілігі қаралып, тиісті шаралар көрілетінін ескертті. Берілген хаттамалық тапсырмалардың орындалуын бақылауды аудан әкімі аппаратының басшысы Есен Алданиязовқа жүктеді.