ТҮРКІСТАН ОБЛЫСЫ КЕЛЕС АУДАНЫНДА ЖАҢА СУ НЫСАНЫ ХАЛЫҚ ИГІЛІГІНЕ БЕРІЛДІ

Түркістан облысы Келес ауданының Жамбыл ауылдық округіне қарасты Майдабозай ауылында жаңа су нысаны халық игілігіне пайдалануға берілді. Нысанның ашылу салтанатына Келес ауданының әкімі Жәнібек Ағыбаев қатысып, ауыл тұрғындарының қуанышымен бөлісті, деп хабарлайды Bugin.kz порталы Түркістан облысы әкімдігінің баспасөз қызметіне сілтеме жасап. 

— Бүгін Майдабозай елді мекенінде жаңа су нысаны ел игіліген табысталғалы тұр. Осы орайда 41 үй, 409 тұрғын  сапалы тіршілік нәріне қол жеткізіп жатыр. Жауапты мамандарға жұмыстың сапалы болып қажетті суды толық жеткізіп беру міндеттелді.  Су  - тіршілік көзі! Су – біздің өміріміз бен денсаулығымыздың қайнар көзі, алтыннан құнды. Сондықтан құрметпен және қамқорлықпен қарайық. Табиғат берген сыйды сақтап қалайық, - деді аудан басшысы Жәнібек Есенұлы.

Айта кетейік, бүгінде аудан бойынша жалпы 83 елді мекеннің 59 елді мекені ауыз сумен қамтылған. 10 елді мекенде жер асты суын іздеу барлау жұмыстары және аудан аумағында су нысандарын реттеу, су шаруашылығын тиімді жүргізу, каналдарды жөндеу жұмыстары қарқынды жүруде.

Қазіргі таңда «Келес Қызмет» КММ тарапынан аудан көлемінде 23 елді мекенге ауыз су беріледі. Келес ауданының елді мекендерін қосымша таза ауыз сумен қамтамасыз ету мақсатында, Зах каналынан магистралды су құбырын, су тазарту арқылы нысаны бойынша жобалау-сметалық жұмыстары жүруде.