Түркістан облысы: Шардарада 20 тұрғын үйдің құрылысы аяқталды

Түркістан облысы, Шардара ауданы әкімі Арман Қарсыбаев Асем-ай шағын ауданынан 1 қабатты 2 пәтерлі 20 тұрғын үй мен «Казкрахмал» зауытының құрылысына барып, жұмыстарды пысықтады, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.    

Айта кетсек, Шардара ауданы бойынша тұрғын үй кезегінде тұрған мұқтаж азаматтардың саны бүгінгі таңда –1400-ден асады. Тұрғын үй кезегінде тұрған әлеуметтік осал топтары мен көп балалы отбасыларды үймен қамтамасыз ету мақсатында жеке инвесторлар тарапынан сатып алынатын арендалық тұрғын үйлердің құрылыстары жүргізілуде.

Бүгінгі таңда, Шардара қаласы Асем-ай шағын ауданынан 1 қабатты 2 пәтерлі 20 тұрғын үйдің (40 пәтер) құрылысы толық аяқталып, құжаттарын рәсімдеу жұмыстары атқарылуда.

Аталған арендалық тұрғын үйлерді тұрғын үй кезегінде тұрған әлеуметтік осал топтары мен көп балалы отбасыларға 2025 жылы беру жоспарланып отыр.

Сондай-ақ, 2024 жылдың мамыр айынан бастап Шардара қаласында «Казкрахмал» зауытының құрылысы басталған болатын. Бұл құрылыстың құны – 35 млрд теңге. Қазіргі уақытта, шамамен құрылыстың 40 пайызы бой көтерді. Айта кетейік, «Казкрахмал» зауыты шамамен 2025 жылы қыркүйек айында өз жұмысын бастауды жоспарлауда.